Salba Nos Lora

 


Lora ta muda pa barionan – vertaald door Diana Sint Jago

Kralendijk, 2 febrüari 2016. Durante di e konteo anual di lora a señalá kasi 900 lora. Ta algu menos ku aña pasá kaminda a hasi un konteo rèkòrt. Spesialmente den besindario di barionan a mira e loranan.

E konteo di e aña aki a tuma lugá riba djasabra. E kantidat di lora kontá ta duna solamente un bista di e minimo kantidat di lora riba e isla. No a konta tur lora.
Diferente partisipante a raportá ku nan a tende mas lora den besindario ku nan por a konta.

Den Parke Nashonal Washington Slagbaai a konta konsiderabelmente menos lora ku aña pasá, ni 120 kompará ku 300 di aña pasá. Ke men ku e mayoria di lora ta pafó di parke. E aña aki tabata un 770 asina, desenas menos ku e aña anterior. Tin algun sitio ku ta konta tur aña pero e repartishon di lora riba e isla por ta diferente kada bes di nobo. E komportashon inpredisibel di e loranan ta hasi ku kada bes e konteo ta un reto pa e partisipantenan voluntario.

Empleadonan di STINAPA a konta den Parke Nashonal Washington Slagbaai. Pafó di e parke tabatin desenas di voluntario aktivo. Ta konta e loranan den un konteo simultáneo. Esei ta nifika ku djasabra mainta tempran promé ku subida di solo desenas di voluntario ta sali kas pa konta lora na e mes un momentu riba henter e isla. Kada lora ku lanta bula ta kont’é un bia. Dor di konta na mes un momentu na diferente sitio e organisadónan ta purba haña un bista di e minimo kantidat di lora ku tin riba e isla. E konteo ta di importansia pa maneho di naturalesa riba nos isla.

No ta tur hende ta masha kontentu ku e loranan. Ora e lora tin hamber e ta baha riba palunan di fruta den bario okanshonando rabia serka e doñonan. E sekura insistente probablemente ta e motibu ku e lora ta sali for di naturalesa i ta buska besindario di hende. Einan nan tin un chèns mas grandi pa haña kuminda. Pa soru ku naturalesa por ofrese mas kuminda den e añanan benidero lo planta palunan lokal ku ta produsí fruta den naturalesa.

Tur aña e konteo di lora ta tuma lugá riba e último djasabra di yanüari. E konteo di e aña aki tabata e di 21 konteo organisá pa e departamentu di Naturalesa i Medio Ambiente di OLB, Fundashon Echo i STINAPA.

“Bescherming papegaaien op Bonaire”