Salba Nos Lora

 

                                 E lora ta e orguyo di Boneiru.



E espesie di lora ku tin na Boneiru ta lokalmente konosí komo e “Lora”.

Su nòmber sientífiko ta Amazona barbadensis i su nòmber na ingles ta Yellow-shouldered Amazon Parrot.

E ta un para ku Boneiru ta mashá orguyoso di dje. Ta haña e tipo di lora aki únikamente na e isla aki, na e kosta nort di Venezuela, na isla di Margarita i na La Blanquilla. Niun kaminda mas na mundu.

Tin aproksimadamente 800 lora ta biba den mondi na Boneiru. E kantidat no ta asina tantu. Ta p’esei Fundashon Salba nos Lora  tin interes den e para úniko aki.



E Lora ta un para koló bèrdè di 35 centimeter di largura. Su kabes i skouder ta koló hel. Ora e habri su ala, por mira kolónan bunita: kòrá, blou, hel i bèrdè. Tin hende ta konfundí e lora ku e prikichi (Aratinga pertinax xanthogenius) ku tambe ta koló bèrdè ku kabes koló hel. Sin embargo, e prikichi ta mas chikitu i su rabu ta relativamente mas largu.




Kaminda di biba i kuminda


E lora ta biba mas parti den área ku hopi palu i banda

di barankanan na nort di Boneiru. Prinsipalmente

na Parke Nashonal Washington Slagbaai i den e área

na Goto meer.


Na hopi okashon e lora ta bula nan dos òf den grupo

grandi. Nan ta produsí un gritu ku por hasi bo surdu,

pero durante di dia nan ta ketu skondí den sombra di e palunan. Promé ku solo sali ora no ta temporada di brui, nan ta agrupá den gran kantidat na e asina yamá nèshinan. Einan nan ta drumi den e palunan òf den hòl di e barankanan. Manera solo sali nan ta lanta buelo i ku gritunan skèrpi nan ta bai na lugánan ku nan por haña kuminda.


Bida di e lora no ta fásil na Boneiru. Speshalmente durante di temporada di sekura tin eskases di kuminda i awa. Den añanan 70 sentenáres a muri di hamber. Durante temporada di sekura nan ta bai zonanan habitá pa haña kuminda den hardin di e habitantenan. Na e okashon ei por mira i tende nan pasobra un par di lora ta grita pa dies.

E loranan ta buska kuminda mainta tempran i atardi lat. Nan ta gusta fruta di palunan outéntiko di e isla i di kadushi. Tambe fruta di palunan ku no ta outéntiko di e isla manera mango i papaya.


Traha nèshi i brui


Temporada di brui di e lora ta luna di mei te ku luna

di sèptèmber. Nan ta traha nan nèshi den hòl di

palunan i di baranka. Na sierto okashon den kadushi.

Nan ta pone un promedio di 3 webu pa kada nèshi.

Ora ku e embra ta riba nèshi, e machu ta tene warda

i sòru pa kuminda. Despues di 24 dia e yunan ta

nase. Tantu e embra komo e machu ta duna e yunan

di kome.  E yunan ta bandoná e nèshi despues di 8

siman. Pero nan te keda algun luna huntu ku nan

mayornan.


Lora úniko

“Protehá loranan op Bonaire”