Salba Nos Lora

 

Preguntanan Frekuentemente Hasí


Kiko mi mester hasi si mi haña un Lora yòn?

Loranan por brui henter aña, ounke mayoria Lora ta traha nèshi den e lunanan di yüli te sèptèmber. Durante i djis despues di e temporada di brui, e Loranan yòn por ser hañá na suela. Nan ta mal alimentá, suak i nan no por bula na drechi. Nan ta duna un impreshon di desampará i konstantemente ta pidi pa kuminda. Ta eksistí e tentashon di kohe e Loranan yòn aki i kuida pa nan, pero ta mihó laga nan.


Ora un Lora yòn nase, nan ta ser bon kuidá pa nan mayornan. Ku e zonido karakterístiko "ka-ka-ka-ka-ka" e Loranan yòn ta pidi kuminda. Tata i mama Lora ta bula bai bin ku ko’i ches hopi dushi. E Loranan yòn ta krese hopi lihé i nan ta haña un bunita plumashi. Despues di tempu e yòn-nan krese bira grandi. Promé ku esei, nan ta kompletamente dependiente di e kuido di nan mayornan. Ta yega e momentu ku e mayornan ta disidí ku ta ora pa e Loranan yòn bandoná e nèshi. Pero e Loranan yòn no ta kla mesora pa entregá nan dushi bida. Pa e Loranan yòn yega dje leu ei, e mayornan ta stòp di alimentá nan. Pa  basta dia e Loranan yòn no ta haña kuminda. Hambrá, nan ta bandoná e nèshi i span nan alanan pa promé bia. Nan a pèrdè bastante peso i ainda nan mester dominá e arte di bula.


Den e grado di kresementu aki, e Loranan yòn ta suak i ta purba bula rònt. Fásilmente por kohe nan. No hasi esei. E mayornan ta den serkania i nan ta tira bista riba nan Lora yòn i ta duna nan kuminda atrobe. Mihó laga e Loranan yòn trankíl.


Ora bo haña un Lora yòn di kual bo ta kere ku su mayornan no ta kuid’é, pone e para riba un taki di un palu serka di e lugá ku bo a hañ’é i yama e tim di Echo Conservation riba nan hotline 795 1188. Nan sa kiko pa hasi. No bai ku e para pasobra esei ta un akto kriminal!


Realmente e Lora ta dje spesial?

Rònt mundu dozeinnan di espesie di Lora ta ser menasá ku ekstinshon. Loranan ta bon konosí komo paranan den kouchi i e habitat natural di e Loranan ta sigui ser afektá. E Lora ta un di e espesie di para ku ta eksepshonal. Niun lugá mas na mundu lo bo haña e para di Amazon ku skoudernan hel (Amazona Barbadensis) òf Lora. Solamente na e kosta parti nort di Venezuela i na algun isla chikitu den laman Karibe. Boneiru ta un di e islanan ei. Adishonalmente, nos ta haña Loranan riba e islanan di Margarita i La Blanquilla, na Venezuela. E habitatnan chikitu di e Lora a ku keda, a ser isolá for di otro. Esaki ta hasi e sobrevivensia di e paranan hopi vulnerabel. I esei tambe ta ser demostrá. Pasobra na Aruba e Lora a bira ekstinto ya pa dekadanan kaba. I na Kòrsou ta un man yen tin, kasi sigur salí for di Boneiru òf nan a hui for di kouchinan.


Dikon no tin Loranan na Kòrsou i Aruba?

E Lora a biba na Aruba, pero a bira ekstinto na final di añanan kuarenta di e último siglo. E kunukeronan tabata yag riba e Loranan pasobra nan ta kousa inkombenensia. Nan tabata kome e maishi òf e frutanan. Tambe, nan habitat tabata kremp pa motibu di urbanisashon kresiente. Na 1947 a opservá e último Lora di den mondi.


No ta kompletamente kla si na Kòrsou tambe tabatin Lora. Aktualmente tin un grupo di amazon kabes hel (Amazona ochrocephala) di den mondi, ta biba einan.


Kon ta protehá e Lora?

Lora ta protehá pa e Konvenionan (areglonan internashonal), legislashon nashonal i legislashon insular.


E Lora ta riba Lista Kòrá di Espesienan Menasá di e Union Mundial di Konservashon (World Conservation Union =IUCN). Tambe e Lora ta riba lista di animalnan protehá di e SPAW Protocol. Esaki ta un tratado internashonal spesífikamente pa e área di Karibe. Ademas, e Lora ta riba lista di CITES (Convention on International Trade in Endangered Species of Wild Fauna and Flora), riba kual tin espesienan peligrá ku ta krítiko. Ta nifiká ku ta kasi imposibel pa eksportá un Lora pa un otro país. E tratadonan protektivo a ser transponé pa legislashon nashonal i insular. Na Boneiru, for di 2008 e Ordenansa Lokal pa Konservashon di Naturalesa ta na vigor. Ta prohibí pa kousa desòrdu pa, kapturá, bende òf mata e Lora. Si un hende hasi esaki intenshonalmente, no ta solamente un violashon di lei pero tambe un akto kriminal. Tin kastigunan severo, inkluso butnan, enkarselashon òf tur dos.


Pero fuera di e isla kompleto, finalmente leinan nashonal i internashonal ta trata di rèspèt i amor pa naturalesa. Nos ta fia e isla aki serka nos yunan. P’esei nos tin un deber di tene e naturalesa bon pa nan; inkluso pa e Loranan.


A sobra hopi Lora ainda?


Pa hopi aña Salba Nos Lora a organisá un konteo anual di Lora.

Loranan ta ser kontá na por lo ménos binti diferente sitio riba e isla, na mes momentu. Esaki ta un manera konfiabel pa kalkulá e kantidat di paranan. Den e promé añanan e resultadonan tabata varia entre 300 i 500 Lora. For di 2006, e resultadonan ta sentenares mas tantu. Esei ta parse manera hopi, pero pa mantené un poblashon di Lora ku ta saludabel i fuerte bo tin mester di bastante para. I nos sa si nos tin algun aña di sekura tras di otro, sentenares di Lora lo por muri di hamber den un periodo kòrtiku


Ekspertonan Britániko di paranan, den kolaborashon ku e Fundashon Salba Nos Lora, pa hopi aña a hasi investigashon sientífiko pa ku “Amazona Barbadensis” manera sientífikonan ta yama nos Lora. Un resumen di e resultadonan por ser hañá na otro parti riba e wèpsait aki.


Kon mi ta stòp Loranan di kome mi mangonan?

E Lora di den mondi ta un para miedoso, ku ta preferá keda leu for di e hendenan. Hamber ta fòrs’é bin serka nos. Ta hopi iritante ku Loranan ku ta buskando kuminda, no ta distinguí kuminda di mondi (naturalesa) for di kuminda di den kunuku òf den hardin. Naturalmente esei ta algu ku bo no por kulpa Loranan p’e. Sinembargo esaki por ta iritante. Pió ainda: Loranan ta kome slòrdu. Hopi fruta ta kai na suela.


Ta un problema ku ta tuma lugá rònt mundu, esta ku paranan ta kome di palunan di fruta òf di e kosecha. E Fundashon Salba Nos Lora ke investigá ki solushonnan a ser hañá i si por apliká nan na Boneiru tambe. Asina ta ku den e ultimo añanan e fundashon a planta sentenares di palunan nativo di fruta den naturalesa òf den kunuku, djis pa e loranan kome. Si e mondi ta proveé kuminda adekuá, no tin motibu pa Loranan buska nan kuminda na otro lugá. Fundashon Salba Nos Lora ta tuma kualke otro ideanan i personanan ku ke partisipá den e implementashon di esaki.


Kon mi por yuda?

Den tempunan di sekura bo por yuda dor di alimentá e paranan. Den término largu lo ta asta mas mihó pa planta palunan ku ta produsí frutanan i simianan, ku ta loke e Loranan ta deseá. Palunan nativo ku ta rekerí poko òf niun awa i ku ta proveé sombra i tene bo kas fresku. Palunan manera e Watakeli, Wayaká, Kwi, Dreifi di laman, Hoba, Mangel (Kamari), Shimaruku òf e Palu di Boneiru. Ora bo tin un palu di fruta den bo hardín manera un mango ku frutanan ku bo ta deseá, djis ranka nan saka ora nan no ta dje hechu ainda. E frutanan por hecha paden. Enrikesé bo hardín i e isla ku mas palu i mata, un skòp, algun mata yòn i esaki ta tuma solamente algun ora di trabou. E Loranan lo gradisí bo!


Finalmente, bo por yuda dor di yama polis, SSV, Polís Ambiental òf e rengernan di STINAPA si bo sa di un hende ku ta molestiá òf yag ilegalmente riba nèshinan òf ta bende Loranan. E number di telefon ta 717-3741 òf 717-8000.


Laga nos traha huntu pa nos por sigurá ku pa hopi tempu nos por disfrutá di e Loranan riba nos isla bendishoná, ku su bunita naturalesa.






“Protehá loranan op Bonaire”